JSST Ebola sabab 139 kishi vafot etganini ma’lum qildi
Virus bilan kasallanishning qariyb 600 ta gumon qilingan holati mavjudligini bildirdi.
Jahon sog‘liqni saqlash tashkiloti (JSST) Kongo Demokratik Respublikasi va Ugandada Ebola virusi bilan bog‘liq vaziyat yuzasidan yangi ma’lumotlarni e’lon qildi. Bu haqda TASS axborot agentligi ma'lum qildi.
JSST bosh direktori Jenevada o‘tkazilgan brifingda ma’lum qilishicha, hozirga qadar Ebola bilan kasallanishning qariyb 600 ta gumon qilingan holati hamda 139 ta ehtimoliy o‘lim holati qayd etilgan.
Uning ta’kidlashicha, virus epidemiyasi rasman aniqlanguniga qadar ma’lum muddat davomida tarqalgan bo‘lishi mumkin va shu sababli kasallanish hamda o‘lim holatlari soni yana ortishi ehtimoli mavjud.
JSST ma’lumotlariga ko‘ra, hozirda Kongo hududida Ebola virusining 51 ta tasdiqlangan holati aniqlangan. Ugandada esa ikki nafar bemorda kasallik laboratoriya orqali tasdiqlangan.
Tashkilot mutaxassislari epidemiologik kuzatuv, bemorlarni izolyatsiya qilish hamda virus tarqalishining oldini olish bo‘yicha choralarni kuchaytirayotganini bildirgan.
