300 mingdan ortiq viza bekor qilindi: Vashington sababini tushuntirdi
Tramp ma’muriyati AQShda immigratsiya siyosatini qat’iylashtirmoqda.
AQSh Davlat departamenti Donald Trampning ikkinchi prezidentlik muddati boshlanganidan buyon xorijiy fuqarolarga berilgan 300 mingdan ortiq vizani bekor qildi. Bu haqda departament matbuot kotibi Tommi Pigott ma’lum qildi.
Uning ta’kidlashicha, Tramp ma’muriyati vizalarni bekor qilish bo‘yicha avvalgi ma’muriyatlarga qaraganda tezroq sur’atda ish olib bormoqda.
“Biz chet elliklarning qonunlarni buzishiga, firibgarlik sodir etishiga yoki milliy xavfsizlikka putur yetkazishiga toqat qilmaymiz”, — deb yozdi Pigott X ijtimoiy tarmog‘idagi sahifasida.
Shuningdek, u AQSh chegaralari va mamlakat xavfsizligini ta’minlash maqsadida tegishli choralar ko‘rish davom ettirilishini bildirdi.
Donald Tramp 2025-yil yanvar oyida AQShning 47-prezidenti sifatida lavozimga kirishganidan beri immigratsiya siyosatini qat’iylashtirish tarafdori bo‘lib kelmoqda. U mamlakatga noqonuniy kirish holatlarini bir necha bor tanqid qilgan.
