Global isish tezlashmoqda: olimlar ogohlantirdi
Yer ekotizimlari halokatli nuqtaga yaqinlashayotgani ma’lum qilindi.
Global isish tezlashib, Yerning eng muhim ekotizimlarini qaytarib bo‘lmas o‘zgarishlar yuz berishi mumkin bo‘lgan kritik chegaralarga yaqinlashtirmoqda. Bu haqda Potsdam iqlim ta’sirini o‘rganish instituti direktori Yoxan Rokstryom Reuters’ning barqaror rivojlanish masalalariga bag‘ishlangan Yevropa konferensiyasida ma’lum qildi.
Olimning aytishicha, marjon riflari va Amazonka yomg‘ir o‘rmonlariga yetayotgan zarar ortga qaytarib bo‘lmaydigan darajaga yaqinlashgan. Shuningdek, Atlantika okeanidagi suv aylanish tizimining ayrim qismlari, jumladan, Karib dengizidan iliq suv olib kelib, G‘arbiy Yevropa iqlimini mo‘tadil saqlashga yordam beradigan oqim ham izdan chiqish xavfi ostida.
Rokstryomning ta’kidlashicha, so‘nggi ilmiy ma’lumotlar yaqin bir necha yil ichida Yer yuzasidagi o‘rtacha harorat sanoatlashuvgacha bo‘lgan davrga nisbatan 1,5 daraja Selsiyga ko‘tarilishi mumkinligini ko‘rsatmoqda. Bu esa ekstremal ob-havo hodisalarining tez-tez yuz berishi va kuchayishiga olib keladi.
Olim bu haqda 9-noyabrda boshlanadigan BMTning COP31 iqlim konferensiyasi arafasida gapirdi.
U kompaniyalarni iqlim o‘zgarishi va tabiatni muhofaza qilish masalalarini yagona yo‘nalish sifatida ko‘rib chiqishga chaqirdi. Uning fikricha, uglerod chiqindilarini kamaytirish bilan birga, biologik xilma-xillikni saqlash va tiklash, shuningdek, chuchuk suv zaxiralarini muhofaza qilishga ham sarmoya kiritish zarur.
Rokstryom ichki yonuv dvigatelli avtomobillardan bosqichma-bosqich voz kechish qoidalarini yumshatishga qaratilgan lobbichilik harakatlarini ham tanqid qildi. Uning ta’kidlashicha, benzin va dizel yoqilg‘isiga berilayotgan subsidiyalar iste’molchilarning elektromobillarga bo‘lgan talabini susaytirmoqda.
