Qozog‘istonda Markaziy Osiyodagi ilk uchuvchi taksi sinovdan o‘tkazildi

 

Qozog‘istonda eVTOL turidagi havo taksisi prototipining ilk namoyish parvozi Olmaota viloyatidagi Bayserke qishlog‘i yaqinida joylashgan Alatau shahrida bo‘lib o‘tdi. Bu haqda kz.kursiv nashri xabar berdi.

 

Loyiha Alatau Advance Air Group Ltd. kompaniyasi tomonidan amalga oshirilmoqda. Kompaniya Alatau hududida shahar havo harakatchanligi tizimini rivojlantirishni maqsad qilgan.

Namoyish doirasida Xitoyning Shanxay shahridagi AutoFlight kompaniyasi tomonidan ishlab chiqarilgan eVTOL qurilmasi sinovdan o‘tkazilgan. eVTOL — vertikal uchish va qo‘nishga qodir elektr samolyot bo‘lib, dron, vertolyot va an’anaviy samolyot texnologiyalarini birlashtiradi. Ushbu transport turi havo taksisi, shahar transporti hamda yuk tashish xizmatlari uchun mo‘ljallangan.

 

                                         

 

Alatauda namoyish etilgan AutoFlight Prosperity modeli soatiga 200 kilometrgacha tezlikka erisha oladi va 200 kilometrgacha masofani bosib o‘tishga qodir. Qurilma uchuvchi bilan birga besh nafar yo‘lovchini tashishi mumkin. Shuningdek, uning yuk ko‘tarish quvvati 2,4 tonnani tashkil etadi.

 

Samolyotning qanotlari uzunligi 15 metr, korpusining uzunligi esa 11 metrni tashkil qiladi. Qurilma 13 ta elektr dvigatel va parrak bilan jihozlangan.

 

                                             

Loyiha doirasida Alatau hududida maxsus uchirish maydonchasi ham qurilgan. Hozirda u sinov markazi sifatida foydalanilmoqda. Kelgusida mazkur hududda yo‘lovchilar uchun terminal — vertiport qurilishi rejalashtirilgan. Unda chiptalarni xarid qilish, ro‘yxatdan o‘tish, xavfsizlik nazoratidan o‘tish va parvoz oldidan kutish zonalari tashkil etiladi.

 

Ma’lum qilinishicha, AutoFlight Prosperity modeli hozirda sertifikatlash bosqichida bo‘lib, 2027-yilga qadar parvoz sertifikatini olishi kutilmoqda.

Kelajakda bunday havo taksilari Alatau, Olmaota va unga tutash hududlar o‘rtasida yo‘lovchi tashish xizmatlarida foydalanilishi mumkin.