Qozog‘iston 16 yoshgacha bo‘lgan bolalar uchun ijtimoiy tarmoqlar cheklanadi
Qozog‘iston bu borada Avstraliya va Yevropa davlatlari tajribasini o‘rganayotganini bildirgan.
Qozog‘istonda 16 yoshgacha bo‘lgan bolalarning ijtimoiy tarmoqlardan foydalanishini cheklash masalasi muhokama qilinmoqda. Bu haqda Tengrinews.kz nashri xabar berdi.
Ma’lum qilinishicha, mamlakat Madaniyat va axborot vazirligi tomonidan tegishli qonunchilikka o‘zgartirishlar kiritishni nazarda tutuvchi hujjatlar paketi ishlab chiqilgan. Unda voyaga yetmaganlarning onlayn platformalarda ro‘yxatdan o‘tishini cheklovchi normalar ham mavjud.
Madaniyat va axborot vaziri o‘rinbosari Yevgeniy Kochetovning aytishicha, hozircha mazkur cheklovni amalga oshirish mexanizmlari yakuniy shakllantirilmagan. Hujjat ayni paytda davlat idoralari bilan muvofiqlashtirilmoqda va hali parlament muhokamasiga kiritilmagan.
Rasmiyga ko‘ra, cheklovlar asosan 16 yoshgacha bo‘lgan yangi foydalanuvchilarning ijtimoiy tarmoqlarda akkaunt ochishiga taalluqli bo‘lishi mumkin. Shu bilan birga, mavjud akkauntlarga qanday tartib qo‘llanishi masalasi hali muhokama qilinmoqda.
Kochetov bu tashabbusni “global trend” deb atab, Avstraliya ijtimoiy tarmoqlar bo‘yicha yosh cheklovlarini joriy etgan ilk davlatlardan biri bo‘lganini eslatgan. Shuningdek, bir qator Yevropa davlatlari ham shu yo‘nalishda qonunchilikni qayta ko‘rib chiqayotgani ta’kidlangan.
Rasmiylarning bildirishicha, Qozog‘iston boshqa davlatlar tajribasini, jumladan yoshni aniqlash va foydalanuvchilarni tekshirish tizimlarini ham o‘rganmoqda. Yakuniy qonun loyihasi yangi parlament — Qurultoy tomonidan ko‘rib chiqilishi kutilmoqda.
