Yozgi ta’tilda o‘quvchilar nazorati yuzasidan kafolat xati olinayotgani rad etildi
Maktabgacha va maktab ta’limi vazirligi bu mazmunda hech qanday ko‘rsatma yoki tavsiya berilmaganini ma’lum qildi.
Ijtimoiy tarmoqlarda umumta’lim maktablari sinf rahbarlaridan o‘quvchilarni yozgi ta’til davrida nazorat qilib borish hamda ota-onalar bilan hamkorlik qilish bo‘yicha kafolat xati talab qilinayotgani haqida xabarlar tarqaldi.
Maktabgacha va maktab ta’limi vazirligi axborot xizmati rahbari mazkur holat yuzasidan rasmiy munosabat bildirib, hududiy bo‘linmalar va ta’lim muassasalariga bu mazmunda hech qanday ko‘rsatma yoki tavsiya berilmaganini ma’lum qildi.
Ijtimoiy tarmoqlarda tarqalgan kafolat xati namunasida sinf rahbari o‘zi rahbarlik qilayotgan o‘quvchilarni qattiq nazoratga olishi, har xil o‘tirishlar, pul yig‘imlari qilishlariga yo‘l qo‘ymasligini kafolatlashi ko‘rsatilgan. Ularning ota-onalaridan kafolat xatlari olishi, ta’til vaqtida muntazam aloqada bo‘lib turishi, kafolat xatida qayd etilgan holatlar yuzasidan har kuni maktab direktoriga va MMIBDO‘ga axborot berishi keltirilgan.
