Dunyoda 2008-yilgi iqtisodiy inqiroz takrorlanishi mumkin
AQSh, Isroil va Eron o‘rtasidagi keskinlik energiya bozoriga bevosita ta’sir qilmoqda.
Bloomberg nashrining manbalarga tayanib xabar berishicha, konsalting kompaniyasi Rapidan tahlilchilari global neft bozori keskin beqarorlik sharoitida 2008-yilgi moliyaviy inqirozga o‘xshash xavfli ssenariy yuzaga kelishi mumkinligidan ogohlantirdi.
Mutaxassislar prognoziga ko‘ra, asosiy suv yo‘li iyul oyi boshida qayta ochilishi mumkin bo‘lsa-da, bu davrda global neftga bo‘lgan talab kuniga o‘rtacha 2,6 million barrelga qisqarishi ehtimoli bor.
Shu sharoitda Brent markali neft narxi yoz oylarida bir barrel uchun 130 dollargacha ko‘tarilishi mumkinligi aytilmoqda.
Tahlilchilarga ko‘ra, agar ta’minotdagi uzilishlar avgustgacha davom etsa, uchinchi chorakda global neft tanqisligi kuniga 6 million barrelgacha yetishi ehtimoli mavjud. Bu esa bozorni uzoq muddatli bosim ostida qoldirishi mumkin.
Mutaxassislar, shuningdek, joriy geosiyosiy keskinliklar — xususan AQSh, Isroil va Eron o‘rtasidagi ziddiyatlar — energiya bozorida inflyatsion bosimni kuchaytirayotganini ta’kidlamoqda.
Rapidan tahlilchilarining qayd etishicha, hozirgi makroiqtisodiy vaziyat 1970-yillar yoki 2007–2008-yillardagi kabi chuqur emas, biroq neft narxlarining keskin oshishi global moliyaviy xavflarni sezilarli darajada kuchaytirishi mumkin.
