Lionel Messi milliarderlar ro‘yxatiga kiritildi — Bloomberg
Futbolchining boyligi 1 milliard dollardan oshgani ma’lum qilindi.
Bloomberg nashri argentinalik futbolchi Lionel Messini milliarderlar ro‘yxatiga kiritdi. Shu tariqa, sakkiz karra “Oltin to‘p” sohibi, “Inter Mayami” klubi va Argentina terma jamoasi hujumchisi Lionel Messi rasmiy ravishda milliard dollardan ortiq boylikka ega sportchilar safidan joy oldi.
Ma’lumotlarga ko‘ra, 2007-yildan buyon professional faoliyat yuritib kelayotgan 38 yoshli futbolchi ish haqi, bonuslar va tijoriy shartnomalar hisobidan qariyb 700 million dollar daromad olgan. Natijada uning umumiy boyligi 1 milliard dollardan oshgan.
Shu bilan Messi Bloomberg Billionaires Index reytingida milliarder futbolchilar orasida ikkinchi o‘rinni egallagan. Avvalroq Saudiya Arabistonining “Al-Nasr” klubi va Portugaliya terma jamoasi hujumchisi Krishtianu Ronaldu ham ushbu ro‘yxatga kiritilgan edi.
Messi 2023-yildan buyon AQShning “Inter Mayami” klubida to‘p surmoqda. U futbol tarixidagi eng ko‘p sovrin yutgan o‘yinchilardan biri bo‘lib, 46 ta sovringa ega. Uning yutuqlari orasida 2022-yilgi Jahon chempionati g‘alabasi, “Barselona” bilan Chempionlar Ligasi va Ispaniya chempionati sovrinlari, shuningdek “PSJ” safidagi Fransiya chempionliklari mavjud.
