Qurbon hayiti arafasida Toshkent avtovokzalidan 55 ta qo‘shimcha reys yo‘lga qo‘yildi
Yo‘lovchilar sonidan kelib chiqib, qo‘shimcha reyslar soni yana oshirilishi mumkin.
Qurbon hayiti arafasida Toshkent avtovokzalidan qo‘shimcha avtobus reyslari yo‘lga qo‘yildi. Bu haqda YHXX axborot xizmati xabar berdi.
Ma’lum qilinishicha, bayram kunlari arafasida yo‘lovchilar oqimi keskin oshgani sabab Toshkentdan Sirdaryo orqali voha viloyatlariga qatnovchi avtobus yo‘nalishlari soni kengaytirilgan. Hozirda mavjud 65 ta doimiy yo‘nalishga qo‘shimcha ravishda yana 55 ta reys tashkil etilgan.
Mas’ullar fuqarolarga uyidan chiqmagan holda telefon yoki maxsus platformalar orqali chiptalar mavjudligini tekshirish hamda ularni onlayn xarid qilish imkoniyati yaratilganini bildirgan. Shuningdek, yo‘lovchilar sonidan kelib chiqib, qo‘shimcha reyslar soni yana oshirilishi mumkin.
Bayram kunlari xalqaro ahamiyatdagi avtomobil yo‘llarida YPX xodimlari kuchaytirilgan tartibda xizmat olib boradi. Haydovchilar bilan o‘tkazilayotgan profilaktik tadbirlarda esa yo‘l kira narxlarini sun’iy oshirmaslik, qatnov oldidan yetarlicha dam olish hamda yo‘l harakati qoidalariga qat’iy amal qilish masalalariga alohida e’tibor qaratilayotgani ta’kidlangan.
Eslatib o‘tamiz, Prezident Shavkat Mirziyoyev tomonidan Qurbon hayitini nishonlash to‘g‘risidagi qaror imzolangandi. Hujjatga ko‘ra, 2026-yilda Qurbon hayitining birinchi kuni 27-may — chorshanba kuniga to‘g‘ri keladi.
