Rasman Qurbon hayiti qachon nishonlanishi ma'lum qilindi

 

O‘zbekiston Prezidenti Shavkat Mirziyoyev “Muborak Qurbon hayitini nishonlash to‘g‘risida”gi qarorni imzoladi.

Qarorga muvofiq, O‘zbekiston musulmonlari idorasining 2026-yilda Qurbon hayitining birinchi kuni 27-may — chorshanba kuniga to‘g‘ri kelishi haqidagi axboroti ma’lumot uchun qabul qilindi hamda ushbu sana mamlakatimizda Qurbon hayiti bayrami sifatida keng nishonlanishi belgilandi.

Hujjatda qayd etilishicha, Qurbon hayiti insonparvarlik, saxovat, bag‘rikenglik, mehr-oqibat va shukronalik kabi ezgu qadriyatlarni mustahkamlashda muhim ahamiyat kasb etadi. Ayniqsa, yordamga muhtoj insonlarni qo‘llab-quvvatlash, jamiyatda hamjihatlik va ijtimoiy birdamlikni kuchaytirishda ushbu muborak ayyomning o‘rni alohida ekani ta’kidlangan.

Shuningdek, Mehnat kodeksiga muvofiq Qurbon hayitining birinchi kuni ishlanmaydigan bayram kuni hisoblanadi. Prezidentning avvalgi farmoniga asosan 2026-yil 28 va 29-may kunlari barcha xodimlar uchun qo‘shimcha dam olish kunlari etib belgilangan. Olti kunlik ish haftasida ishlovchilar uchun esa 30-may — shanba kuni ham dam olish kuni bo‘ladi.

Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklariga Qurbon hayitini milliy an’ana va urf-odatlarga uyg‘un holda, ko‘tarinki ruhda tashkil etish yuzasidan tegishli chora-tadbirlarni amalga oshirish topshirildi.

Bundan tashqari, Turizm qo‘mitasi va Transport vazirligiga hayit kunlarida ziyoratgohlar va tarixiy qadamjolarga tashrif buyurish uchun aholiga qulay sharoit yaratish vazifasi yuklatildi.

Qaror ijrosi Bosh vazir Abdulla Aripov hamda Prezident maslahatchisi Suxrob Umurzakov zimmasiga yuklatilgan.