Pokistonda portlash oqibatida kamida 19 kishi halok bo‘ldi
Mazkur portlash uchun javobgarlikni “Balujiston ozodlik armiyasi” guruhi o‘z zimmasiga oldi.
Pokistonning janubi-g‘arbidagi Kvetta shahrida yo‘lovchi poyezdi o‘tayotgan paytda xudkush terrorchi portlovchi moddalar ortilgan avtomobilni temiryo‘l yaqinida portlatdi. Bu haqda AP xabar berdi.
Rasmiylarga ko‘ra, hodisa oqibatida kamida 19 kishi halok bo‘lgan, 70 dan ortiq odam yaralangan.
Ijtimoiy tarmoqlarda tarqalgan videolarda portlash kuchi sabab poyezdning ikki vagoni ag‘darilib, yonib ketgani va osmonni qalin qora tutun qoplagani aks etgan.
Guvohlar hamda ijtimoiy tarmoqlarda tarqalgan suratlarga ko‘ra, hujum xavfsizlik kuchlari odatda joylashadigan hududda sodir bo‘lgan. Portlash natijasida yaqin atrofdagi bir nechta bino jiddiy zarar ko‘rgan va yo‘l bo‘yida turgan o‘ndan ortiq avtomobil shikastlangan.
Yaradorlar shifoxonaga olib ketilgan bo‘lib, ularning 20 nafari og‘ir ahvolda.
Pokiston markaziy hukumatidan mustaqillik talab qiluvchi taqiqlangan “Balujiston ozodlik armiyasi” (BLA) guruhi jurnalistlarga yuborgan bayonotida hujum uchun javobgarlikni o‘z zimmasiga oldi. Guruh bayonotida xavfsizlik xodimlarini olib ketayotgan poyezd nishonga olingani aytilgan.
“Biz begunoh fuqarolarning nishonga olinishi va odamlarning halok bo‘lganidan chuqur qayg‘udamiz. Terrorchi unsurlarga hech qanday yon bosish bo‘lishi mumkin emas”, — dedi Balujiston viloyati hukumati matbuot kotibi Shahid Rind.
Uning so‘zlariga ko‘ra, portlashdan keyin Kvetta shifoxonalarida favqulodda tibbiy holat e’lon qilingan va hodisa yuzasidan tergov boshlangan.
Pokiston hukumati qo‘zg‘olon bostirilganini ta’kidlayotgan bo‘lsa-da, Balujistonda zo‘ravonliklar davom etmoqda.
2024-yilda Balujistondagi temiryo‘l vokzaliga uyushtirilgan xudkush hujum oqibatida kamida 26 kishi halok bo‘lgan.
