So‘nggi qo‘ng‘iroq arafasida o‘quvchilar mashina boshqarishiga qarshi reyd kuchaytirildi
YHXX o‘quvchilar va ularning ota-onalariga murojaat bilan chiqdi.
Yo‘l harakati xavfsizligi xizmati so‘nggi qo‘ng‘iroq tadbirlari oldidan o‘quvchilar va ularning ota-onalariga murojaat bilan chiqdi.
Ma’lum qilinishicha, voyaga yetmaganlar ishtirokidagi yo‘l-transport hodisalarining oldini olish maqsadida respublika bo‘ylab keng ko‘lamli targ‘ibot vа reyd tadbirlari o‘tkazilmoqda. Bunga keyingi paytlarda haydovchilik guvohnomasiga ega bo‘lmagan o‘quvchilarning avtomobil boshqarayotgani va buning oqibatida ko‘ngilsiz holatlar yuz berayotgani sabab bo‘lgan.
YHXX o‘quvchilarni haydovchilik huquqiga ega bo‘lmasdan avtomobil boshqarmaslikka chaqirdi.
“Aziz bitiruvchilar, yo‘l harakati qoidalari bo‘yicha yetarli bilim va ko‘nikmaga, shuningdek haydovchilik huquqiga ega bo‘lmasdan turib, avtomobil yo‘llarida o‘zingizni qurbon qilmang”, — deyiladi murojaatda.
Shuningdek, ota-onalardan farzandlariga avtomobil kalitini bermaslik so‘raldi.
“Farzandingizning bir lahzalik quvonchiga hissa qo‘shaman deb, uning kelajagiga ziyon yetishiga sababchi bo‘lib qolmang”, — deya ogohlantirdi YHXX.
Qayd etilishicha, reydlar davomida aniqlangan har bir qoidabuzarlik uchun qonunchilikda belgilangan choralar ko‘riladi.
Eslatib o‘tamiz, 20-may kuni Qo‘qonda voyaga yetmagan haydovchi Malibu-2 avtomobilida 10 yoshli uch nafar qizni urib yuborgandi. Oqibatda ulardan biri vafot etgan. Holat yuzasidan jinoyat ishi qo‘zg‘atilib, voyaga yetmagan haydovchi protsessual tartibda ushlangan.
