Farg'onada voyaga yetmagan haydovchi ishtirokidagi YTHda 10 yoshli qiz vafot etdi
Malibu boshqargan voyaga yetmagan shaxs piyodalar yo'lagida uch nafar qizni urib yuborgan.
Farg‘ona viloyatining Qo‘qon shahrida o‘lim bilan bog‘liq yo‘l-transport hodisasi yuz berdi.
Viloyat IIB matbuot xizmatining ma’lum qilishicha, joriy yilning 20-may kuni soat 16:00 larda voyaga yetmagan Z.A. o‘z boshqaruvidagi “Malibu 2” rusumli avtomashinasini Qo‘qon shahri Amir Temur ko‘chasida haydab ketayotib, piyodalar o‘tish joyidan o‘tayotgan 2016-yilda tug‘ilgan uch nafar voyaga yetmagan qizni urib yuborgan.
Hodisa oqibatida voyaga yetmagan M.K. olgan tan jarohatlari sabab shifoxonada vafot etgan.
Mazkur holat yuzasidan voyaga yetmagan Z.A.ga nisbatan Jinoyat kodeksining 266-moddasi 2-qismi bilan jinoyat ishi qo‘zg‘atilib, Jinoyat-protsessual kodeksining 221-moddasi tartibida ushlangan.
Hozirda holat yuzasidan dastlabki tergov harakatlari olib borilmoqda.
