Qashqadaryoda tekshiruvni “bosdi-bosdi” qilishni va’da qilgan IIB xodimi ushlandi
U diniy mazmundagi taqiqlangan materiallar bo‘yicha tekshiruvni ijobiy hal qilish uchun pora so‘ragan.
Qashqadaryo viloyatida diniy mazmundagi taqiqlangan materiallar bilan bog‘liq tekshiruvni “ijobiy hal qilib berish” evaziga pora olgan IIB xodimi qo‘lga olindi. Bu haqda Zamon.uz'ga DXX xabar berdi.
Ma’lum bo‘lishicha, Dehqonobod tumanida yashovchi 1983-yilda tug‘ilgan ayol va uning 2009-yilda tug‘ilgan qizining telefonlarida diniy mazmundagi taqiqlangan materiallar aniqlangani yuzasidan viloyat IIB tomonidan tekshiruv harakatlari olib borilgan.
Tergovga qadar tekshiruv jarayonlarini tanishlari orqali ularning foydasiga hal qilib berishni va’da qilgan 1978-yilda tug‘ilgan shaxs 3 mln so‘m olgan vaqtida ushlangan.
Shundan so‘ng tezkor tadbir davom ettirilib, ushbu masalani ijobiy hal qilish evaziga vositachidan 2,5 mln so‘m olgan vaqtida Qashqadaryo viloyati IIB Tezkor qidiruv xizmati tezkor vakili ashyoviy dalillar bilan qo‘lga olingan.
Hozirda IIB xodimiga nisbatan Jinoyat kodeksining 210-moddasi (pora olish), vositachiga nisbatan esa 212-moddasi (pora olish-berishda vositachilik qilish) bilan jinoyat ishi qo‘zg‘atilgan. Tergov harakatlari olib borilmoqda.
