Buxoroda qoramol o‘g‘risi ushlandi
U qoramolni Gentra’ga yuklab, olib ketayotgan bo‘lgan.
Buxoro viloyatida Gentra avtomobilida qoramol o‘g‘irlashga uringan shaxs qo‘lga olindi. Holat Buxoro tumani hududida o‘tkazilgan profilaktik tadbir davomida aniqlangan, deb xabar berdi IIV axborot xizmati.
Ma’lum qilinishicha, 20-may kuni tungi soat 01:30 lar atrofida Buxoro—Qiziltepa avtomobil yo‘lida harakatlanayotgan qora rangli Gentra ichki ishlar xodimlarida shubha uyg‘otgan. Profilaktika inspektorlari avtomashinani to‘xtatishga uringan, biroq haydovchi qonuniy talabga bo‘ysunmay harakatni davom ettirgan.
Tezkor choralar natijasida avtomobil to‘xtatilib, ko‘zdan kechirilgan. Aniqlanishicha, mashinaning orqa o‘rindiqlari olib tashlangan bo‘lib, salon qismida yirik shoxli qoramol olib ketilayotgan bo‘lgan.
Surishtiruv davomida qoramol Buxoro tumani “Ko‘chko‘mar” mahallasidagi fermer xo‘jaliklaridan birining dala maydonidan yashirin ravishda o‘g‘irlab ketilayotgani ma’lum bo‘lgan. Dastlabki hisob-kitoblarga ko‘ra, ho‘kizning qiymati qariyb 10 million so‘mni tashkil etadi.
Gumonlanuvchi Navoiy viloyati Qiziltepa tumanida yashovchi fuqaro ekani, u avval ham o‘g‘rilik jinoyati uchun sudlangani aniqlangan.
Mazkur holat yuzasidan Jinoyat kodeksining 169-moddasi 3-qismi “a” bandi bilan jinoyat ishi qo‘zg‘atilgan. Hozirda tergov harakatlari olib borilmoqda.
