Fransiyada immigratsiyani uch yilga to‘xtatish taklif qilindi
2025-yilda mamlakatda rekord darajadagi 4,5 million yashash ruxsatnomasi berilgan.
Fransiya adliya vaziri Jerald Darmanin mamlakatda immigratsiyaga uch yillik moratoriy joriy etishni taklif qildi. Bu haqda u Le Journal du Dimanche nashriga bergan intervyusida ma’lum qilgan.
Vazirning ta’kidlashicha, Fransiya xorijliklarni integratsiya va assimilyatsiya qilish borasida o‘z “chegarasiga yetgan”. Shu sababli u immigratsiyani sezilarli darajada cheklash zarurligini bildirgan.
Darmanin bir qator qo‘shimcha choralarni ham taklif etgan. Jumladan, ishlash uchun yashash ruxsatnomasini olgan xorijliklarning qarindoshlariga oilani birlashtirish asosida yashash huquqi berishni to‘xtatish hamda Fransiya Konstitutsiyasini isloh qilib, immigratsion kvotalarni joriy etish tashabbusini ilgari surgan.
Uning fikricha, hukumat ariza beruvchilar soni, ularning kelib chiqishi va malakasi bo‘yicha mustaqil ravishda cheklovlar belgilash vakolatiga ega bo‘lishi kerak.
“Keling, immigratsiyani to‘xtataylik, chiqarib yuborilishi kerak bo‘lganlarni deportatsiya qilaylik va vizalar berilishini Fransiya hududini tark etish haqidagi qarorlarning bajarilishi bilan bog‘laylik”, — degan Darmanin.
Fransiya Ichki ishlar vazirligi ma’lumotlariga ko‘ra, 2025-yilda mamlakatda rekord darajadagi 4,5 million yashash ruxsatnomasi berilgan. Bu 2024-yilga nisbatan 3,2 foizga ko‘pdir.
Qayd etilishicha, har uchinchi yashash ruxsatnomasi oilani birlashtirish asosida berilgan. Rasmiy statistikaga ko‘ra, Fransiyada qonuniy yashayotgan xorijliklar mamlakat katta yoshli aholisining 8 foizidan ortig‘ini tashkil etadi.
Eng ko‘p yashash ruxsatnomalari Jazoir, Marokash, Tunis va Turkiya fuqarolariga berilgan.
