Andijonda tarkibida taqiqlangan modda mavjud ozdiruvchi qahvalar savdosiga chek qo‘yildi
Jami 11 kilogramm “Keto Coffee Mix” mahsuloti tarkibida kuchli ta’sir qiluvchi “sibutramin” moddasi bo‘lgan.
Andijon viloyatida tarkibida taqiqlangan moddalar bo‘lgan ozdiruvchi kofelar aniqlandi. Bu haqda DXX xabar berdi.
Ma’lum qilinishicha, Marhamat tumani markazidagi savdo majmuasida 1991-yilda tug‘ilgan fuqaro shartli xaridorga 900 dona “Keto Coffee Mix” mahsulotini 6 million so‘mga sotayotgan vaqtida ashyoviy dalillar bilan ushlandi.
Mazkur mahsulotlar Andijon shahridagi “Jahon savdo kompleksi” hududida joylashgan do‘kondan xarid qilingani aniqlangan. Shundan so‘ng tezkor tadbir davom ettirilib, Andijon shahrida yashovchi 1987-yilda tug‘ilgan fuqaroga tegishli savdo nuqtasida tekshiruv o‘tkazildi.
Natijada ushbu do‘kondan jami 480 dona “Keto Coffee Mix” mahsuloti musodara qilindi.
Mutaxassislar xulosasiga ko‘ra, ashyoviy dalil sifatida olingan jami 11 kilogramm “Keto Coffee Mix” mahsuloti tarkibida kuchli ta’sir qiluvchi “sibutramin” moddasi mavjud bo‘lib, uning O‘zbekiston hududidagi muomalasi taqiqlangan.
Mazkur holat yuzasidan jinoiy ish qo‘zg‘atilib, tergov harakatlari olib borilmoqda.
