Xalqaro bolalarni himoya qilish kunida uchta yangi o‘zbek animatsion filmi namoyish etiladi

1-iyun – Xalqaro bolalarni himoya qilish kuni munosabati bilan O‘zbekiston kinematografiya agentligi, O‘zbekiston animatsion studiyalar assotsiatsiyasi hamda “ASTIR” animatsion studiyasi hamkorligida yangi animatsion filmlar premyerasi bo‘lib o‘tadi.

 

Namoyish 1-iyun kuni soat 16:00 da Alisher Navoiy nomidagi O‘zbekiston milliy kino san’ati saroyida tashkil etiladi. Tomoshabinlarga “Zumrad va Qimmat”, “Saxovat” hamda “Burch izidan” animatsion filmlari taqdim etiladi.

 

“Zumrad va Qimmat” filmi xalq ertagi qahramonlarining zamonaviy talqiniga bag‘ishlangan. Har biri 10 daqiqadan iborat ikki qismli filmda qahramonlarning bugungi davrga mos qiyofasi, qiziqishlari va hayot tarzi aks ettirilgan. 

 

• Ssenariy muallifi: Mehrixon Hakimova 
• Rejissyor: Abdulatif Haydarov
• Postanovkachi rassom: Zilola Hamidova
• Kompozitor: Aleksey Izvolskiy

 

“Saxovat” animatsion filmi esa Alisher Navoiyning “Hayrat ul-abror” asari asosida yaratilgan. Asarda saxovat, insoniylik va ezgulik g‘oyalari tarixiy voqealar hamda sarguzashtlar orqali yoritiladi. 

 

• Ssenariy muallifi: Rustam Iqbol
• Rejissyor: Abdulatif Haydarov
• Postanovkachi rassom: Zilola Hamidova
• Kompozitor: Shuhrat Zokirov

 

“Burch izidan” animatsion filmi o‘rmon hayoti va quyonlar sarguzashtlari orqali ota mehr-muhabbati, jasorat va fidoyilik mavzulariga bag‘ishlangan. 

 

• Ssenariy muallifi: Abdulla Chimirzayev
• Rejissyor: Abdulatif Haydarov
• Postanovkachi rassom:Farid Hamroqulov
• Kompozitor: Aleksey Izvolskiy

 

Uchala filmga ham rejissyor sifatida Abdulatif Haydarov boshchilik qilgan. Animatsion qahramonlarga Barno Qodirova, Iroda Ahmedova, Asadullo Nabiyev, Navro‘z Jumayev, Ixtiyor Otajonov, Asadulla Abdullayev, Baxtiyor Yusupov va Erkin Bozorov kabi aktyorlar ovoz bergan.

 

Tashkilotchilar ma’lum qilishicha, animatsion filmlar namoyishi barcha tomoshabinlar uchun bepul bo‘ladi.