BERNAMA: "O‘zbekistondagi Islom sivilizatsiyasi markazi tadqiqotlar uchun BMT arxivlaridan foydalanish imkoniyatiga ega bo‘ldi"
Malayziyaning BERNAMA milliy axborot agentligi O‘zbekiston Islom sivilizatsiyasi markazining xalqaro ilmiy hamkorligi va BMT kutubxonasi hamda arxivlaridan foydalanish imkoniyatiga bag‘ishlangan maqola eʼlon qildi.
Malayziyaning BERNAMA axborot agentligi O‘zbekistondagi Islom sivilizatsiyasi markazi BMT kutubxonasi va arxivlaridan foydalanish imkoniyatiga ega bo‘lgani haqida xabar berdi.
Malayziyaning BERNAMA milliy axborot agentligi O‘zbekistondagi Islom sivilizatsiyasi markazining xalqaro ilmiy faoliyati va Birlashgan Millatlar Tashkiloti bilan hamkorligiga bag‘ishlangan maqola eʼlon qildi.
Maqolada asosiy eʼtibor Markaz va BMTning Jenevadagi kutubxonasi o‘rtasida hamkorlik o‘rnatish bo‘yicha erishilgan kelishuvga qaratilgan. Mazkur kelishuv O‘zbekiston va Markaziy Osiyo tarixiga oid manbalarni ilmiy jihatdan o‘rganish uchun yangi imkoniyatlar yaratadi. Agentlik taʼkidlashicha, BMT kutubxonasi va arxiv materiallaridan foydalanish mintaqaning tarixiga doir shu paytgacha nomaʼlum bo‘lgan maʼlumotlarni tadqiq etish imkonini beradi.
BERNAMA, shuningdek, Jenevadagi Millatlar saroyida tashkil etilgan «Sivilizatsiyalar, shaxslar, kashfiyotlar» xalqaro ko‘rgazmasi hamda Movarounnahrning maʼnaviy va ilmiy merosiga bag‘ishlangan ilmiy konferensiya haqida ham batafsil maʼlumot berdi.
BMTning Jenevadagi bo‘linmasi Bosh direktori Tatyana Valovaya Markazning tarixiy merosni zamonaviy texnologiyalar yordamida namoyish etishga qaratilgan yondashuvini yuqori baholab, BMT kutubxonasi va Markaz o‘rtasidagi hamkorlik istiqbollariga ishonch bildirdi.
Maqolada, shuningdek, Markaz tomonidan ko‘rgazmada namoyish etilgan kitoblarning BMTning Jenevadagi bo‘linmasi kutubxonasiga hadya qilingani, Buxoro, Samarqand va Termizdan yetishib chiqqan buyuk allomalarning jahon sivilizatsiyasi rivojiga qo‘shgan hissasi haqida ham so‘z yuritilgan.
BERNAMA agentligida eʼlon qilingan mazkur material O‘zbekistondagi Islom sivilizatsiyasi markazining ilmiy tashabbuslari xalqaro ahamiyat kasb etayotganini hamda BMT bilan ilmiy-tadqiqot yo‘nalishidagi hamkorlikni kengaytirish istiqbollarini alohida taʼkidlaydi.
