Turk kinosi yulduzlari Toshkentda: kino kunlari boshlanadi
25–29-sentabr kunlari Toshkentda “Turk kinosi kunlari” bo‘lib o‘tadi. Tadbirning ochilish marosimida Engin Altan Duzyatan, Ozge Gurel, Serkan Chayoglu va Deniz Barut o‘zbekistonlik muxlislar bilan uchrashadi.
25–29-sentabr kunlari Toshkentda Turkiya–O‘zbekiston madaniyat va san’at uchrashuvlari doirasida “Turk kinosi kunlari” bo‘lib o‘tadi. Bu haqda Turkiyaning O‘zbekistondagi elchixonasi Zamon.uz'ga ma'lum qildi.
O‘zbekiston mustaqilligining 35 yilligi munosabati bilan tashkil etilayotgan tadbir Turkiya Madaniyat va turizm vazirligi Kinematografiya bosh boshqarmasi ko‘magida O‘zbekiston Milliy kino san’ati saroyida o‘tkaziladi.
Besh kun davomida tomoshabinlarga turli janrlardagi turk filmlari namoyish etiladi. Dasturdan ijodiy uchrashuvlar hamda taniqli kino vakillari ishtirokidagi tadbirlar ham o‘rin olgan.
25-sentabr kuni bo‘lib o‘tadigan tantanali ochilish marosimida taniqli turk aktyorlari Engin Altan Duzyatan, Ozge Gurel, Serkan Chayoglu va Deniz Barut qizil yo‘lakdan o‘tib, o‘zbekistonlik muxlislar bilan uchrashadi.
Ochilish marosimida Turkiyaning madaniy merosi va sayyohlik salohiyatini xalqaro tomoshabinlarga tanishtiruvchi “Kökenlerin Fısıltısı” mini-seriali ham namoyish etiladi. Unda bosh rollarni ijro etgan Engin Altan Duzyatan va Ozge Gurel gala-kechada tomoshabinlar bilan uchrashadi.
Shuningdek, TRT telekanalining “Mehmed: Fetihler Sultanı” serialida Fotih Sulton Mehmed obrazini gavdalantirgan Serkan Chayoglu hamda “Bak Postacı Geliyor” filmida Gulizar rolini ijro etgan Deniz Barut tadbirda ishtirok etadi.
26-sentabr kuni film namoyishlari rejissyor Tunç Davutning “Kesilmiş Bir Ağaç Gibi” filmi bilan boshlanadi. Ali Ipin, Feyyaz Duman va Selen Kurtaran bosh rollarni ijro etgan ushbu film 99-Oskar mukofotining “Eng yaxshi xalqaro film” yo‘nalishida Turkiyaning rasmiy nomzodi sifatida tanlangan.
27-sentabr kuni rejissyor Yüksel Aksuning “Bak Postacı Geliyor” filmi namoyish etiladi. 1950-yillarda Egey mintaqasidagi kichik shaharchada kechadigan voqealar markazida pochtachi Osmonning Gulizarga yetishish yo‘lidagi kurashi tasvirlangan. Bosh rollarni Deniz Barut va Ozan Akbaba ijro etgan.
28-sentabr kuni rejissyorlar Ibrahim Büyükak va Emrah Ağuş suratga olgan “Mutluyuz mu?” filmi tomoshabinlarga taqdim etiladi. Unda bosh rollarni Ibrahim Büyükak va Yasemin Sakallıoğlu ijro etgan.
“Turk kinosi kunlari” 29-sentabr kuni rejissyorlar Emre Karael va Leyla Yamaning “Dedektif Reptır” animatsion filmi namoyishi bilan yakunlanadi. Film sirli voqealarga oydinlik kiritishga intilayotgan Detektiv Reptır va uning jamoasi sarguzashtlari haqida hikoya qiladi.
