AQSH Isroil va Livanga yangi sulh tashabbusini taklif qildi
Taklifga ko‘ra, Hizbulloh hujumlarni to‘xtatadi, Isroil esa mojaroning kengayishidan tiyiladi.
AQSh Isroil va Livan o‘rtasidagi keskinlikni kamaytirish maqsadida yangi sulh tashabbusini ilgari surdi. Bu haqda Axios nashri AQSh rasmiylariga tayanib ma’lum qildi.
Xabarlarga ko‘ra, AQSh Davlat kotibi Marko Rubio Isroil va Livan rahbariyatiga mojaroni yumshatishga qaratilgan yangi taklif bilan chiqqan. Tashabbusga muvofiq, birinchi bosqichda Hizbulloh Isroilga qarshi barcha hujumlarni to‘xtatishi kerak. Buning evaziga Isroil Bayrut yo‘nalishida harbiy harakatlarni kengaytirishdan va vaziyatni yanada keskinlashtirishdan tiyiladi.
Manbaning bildirishicha, so‘nggi 48 soat davomida Rubio Livan prezidenti Josef Aun hamda Isroil bosh vaziri Benyamin Netanyahu bilan telefon orqali muloqot qilgan.
Axios manbasiga ko‘ra, Livan prezidenti mazkur tashabbusni ilgari surishga harakat qilgan. Biroq Livan parlamenti spikeri Nabih Berri Isroil birinchi bo‘lib harbiy harakatlarni to‘xtatishi kerakligini bildirgan. Shu bilan birga, u Hizbulloh sulh shartlariga rioya qilishiga kafolat bera olishini ma’lum qilgan.
