Rossiya Ukrainaning bir necha shahri aviazarbalar berdi — 10 dan ortiq kishi halok bo'ldi
Hujum davomida jami 73 ta raketa va 656 ta turli xil dronlar qo‘llangan.
Rossiya kuchlari 2-iyunga o‘tar kechasi Ukraina hududiga navbatdagi keng ko‘lamli raketa va dron hujumini amalga oshirdi. Zarbalar Kiyev, Dnepr, Xarkov, Zaporijjiya hamda bir qator boshqa viloyatlarni qamrab olgan. Bu haqda BBC xabar berdi.
Ukraina rasmiylarining ma’lum qilishicha, hujumlar oqibatida Kiyevda kamida 5 kishi, Dneprda esa 9 kishi halok bo‘lgan. Shuningdek, o‘nlab fuqarolar turli darajadagi tan jarohatlari olgan.
Hujum arafasida Vladimir Zelenskiy va mamlakat harbiy rahbariyati Rossiya yangi qo‘shma raketa va dron hujumiga tayyorlanayotgani haqida ogohlantirgan hamda aholini havo xavfi signallariga jiddiy munosabatda bo‘lishga chaqirgan edi.
Ukraina Harbiy-havo kuchlari ma’lumotlariga ko‘ra, tungi hujum davomida jami 73 ta raketa va 656 ta turli turdagi dron qo‘llangan. Jumladan, zarbalar uchun “Kalibr” qanotli raketalari, “Iskander-M” ballistik raketalari, X-101 qanotli raketalari va “Tsirkon” raketalaridan foydalanilgan.
Ukraina harbiylari 40 ta raketa hamda 602 ta dron urib tushirilgani yoki radioelektron vositalar yordamida zararsizlantirilganini ma’lum qilgan. Shu bilan birga, 33 ta raketa va 33 ta dron o‘z nishonlariga yetib borgani qayd etilgan.
Rossiya Mudofaa vazirligi esa hujumlar Ukraina harbiy-sanoat kompleksi korxonalari, yoqilg‘i infratuzilmasi obyektlari, transport tarmoqlari va harbiy aerodromlarga qaratilganini bildirgan.
Ma’lumotlarga ko‘ra, hujumlar Kiyev, Xarkov, Dnepr va Zaporijjiya shaharlari bilan bir qatorda Poltava, Xmelnitskiy hamda Sumi viloyatlarida ham qayd etilgan.
