Tojikistonda havo shari qulashi oqibatida 3 kishi jarohatlandi, biri O‘zbekiston fuqarosi
Bolalar kuni tadbiri davomida kuchli shamol oqibatida havo shari nazoratdan chiqib, binolar ustiga qulagan.
Tojikistonning Xo‘jand shahrida Bolalar kuni tadbiri doirasida O'zbekistndan olib kelingan havo shari kuchli shamol oqibatida boshqaruvdan chiqib, turar-joy binolari tomlariga qulashi natijasida uch kishi jarohat oldi. Bu haqda Asiaplus nashri xabar berdi.
Hodisa 1-iyun kuni kechki vaqtda Kamoli Xo‘jandiy teatri yaqinida qayd etilgan. Dastlabki ma’lumotlarga ko‘ra, bayram tadbiri tashkilotchilari tomonidan o‘rnatilgan havo shari kuchli shamol sabab boshqaruvni yo‘qotib, yaqin atrofdagi binolar ustiga qulashi natijasida xavfli vaziyat yuzaga kelgan.
Ma’lum qilinishicha, jarohat olganlar orasida O‘zbekiston fuqarosi ham bor bo‘lib, ular tezkor ravishda shifoxonaga yetkazilgan va ularga zarur tibbiy yordam ko‘rsatilgan.
Voqea joyiga Favqulodda vaziyatlar xizmatlari hamda tegishli idoralar zudlik bilan yetib borib, hududda xavfsizlik choralarini ko‘rgan. Dastlabki baholashlarga ko‘ra, holat favqulodda vaziyat emas, balki kuchli shamol oqibatida yuz bergan baxtsiz hodisa sifatida qayd etilmoqda.
Havo shari qulashi natijasida bir nechta uylarning tom qismiga zarar yetgan.
