Putin va Zelenskiy uchrashishi kerak — Tramp
AQSh prezidenti ikki davlat rahbarining bevosita muloqoti mojaroni hal etish yo‘lidagi muhim qadam bo‘lishi mumkinligini aytdi.
AQSh prezidenti Donald Tramp Vladimir Putin va Vladimir Zelenskiy o‘rtasida to‘g‘ridan-to‘g‘ri uchrashuv o‘tkazilishi g‘oyasini qo‘llab-quvvatlashini ma’lum qildi.
Oq uyda jurnalistlar bilan muloqot chog‘ida Tramp ikki davlat rahbarlarining uchrashuvi mojaroni hal etish yo‘lidagi muhim qadam bo‘lishi mumkinligini ta’kidlagan.
“Menimcha, ular uchrashsa juda yaxshi bo‘lardi. Ular bu mojaroga yakun yasashlari kerak”, — degan AQSh prezidenti.
Tramp, shuningdek, Rossiya va Ukraina o‘rtasida tinchlikka erishish uchun murosaga asoslangan yechim zarurligini qayd etgan. Uning so‘zlariga ko‘ra, tomonlar kelishuvga erishish yo‘lida muayyan yon berishlarga tayyor bo‘lishi lozim.
AQSh yetakchisi Vashington ushbu jarayon bilan yaqindan shug‘ullanayotganini bildirib, mojaroga barham berish bo‘yicha diplomatik sa’y-harakatlar davom etayotganini ta’kidlagan.
Avvalroq Ukraina prezidenti Rossiya prezidentiga ochiq maktub yo‘llab, urushni tugatish va oliy darajadagi to‘g‘ridan-to‘g‘ri muzokaralarni boshlashni taklif qilgan edi. Kreml esa mazkur maktub qabul qilinganini va uning mazmuni Rossiya prezidentiga yetkazilishini ma’lum qilgan.
