Sahroi Kabirda 50 ga yaqin kishi suvsizlikdan halok bo‘ldi
Cho‘lda yuk mashinasi buzilib qolgan. Mashinada Qurbon hayiti munosabati bilan Maliga borgan va u yerdan qaytayotgan Niger fuqarolari bo‘lgan.
Nigerning shimoliy qismidagi Sahroi Kabir cho‘lida yuk mashinasi buzilib qolishi oqibatida kamida 49 kishi halok bo‘ldi. Bu haqda BBC xabar berdi.
Mahalliy hokimiyat ma’lumotlariga ko‘ra, qurbonlar uzoq vaqt davomida suvsiz qolgan.Hodisa Qurbon hayiti munosabati bilan Maliga borgan va u yerdan qaytayotgan Niger fuqarolari bilan sodir bo‘lgan.
Ularni olib ketayotgan yuk mashinasi Niger va Jazoir chegarasidagi Assamaka o‘tish punktidan 80 kilometrdan ortiq masofada buzilib qolgan.
Agadez viloyati gubernatori ma’lum qilishicha, yo‘lovchilar yuqori harorat hukm surayotgan va ta’minot manbalari mavjud bo‘lmagan hududda qolib ketgan. Haydovchi va yo‘lovchilar bir necha kun davomida transport vositasini ta’mirlashga uringan, biroq buning uddasidan chiqa olmagan.
Natijada yo‘lovchilarning aksariyati suvsizlikdan vafot etgan. Qutqaruvchilar yuk mashinasi ostida va uning atrofida o‘nlab jasadlarni topgan. Halok bo‘lganlarning barchasi Niger fuqarolari bo‘lib, ular ommaviy qabrlarga dafn etilgan.
Fojiadan faqat ikki kishi omon qolgan. Ular piyoda Assamakagacha yetib borib, hodisa haqida hokimiyat organlariga xabar bergan.
Qutqaruv guruhi voqea joyidan qaytayotganda yana bir buzilib qolgan yuk mashinasini aniqlagan. Unda bo‘lgan 60 nafardan ortiq kishi akkumulyator nosozligi sabab uch kun davomida cho‘lda qolib ketgan. Qutqaruvchilar ularga suv yetkazib bergan va transport vositasini ta’mirlashga yordam ko‘rsatgan.
Mutaxassislar Niger cho‘li G‘arbiy Afrikadan Yevropaga yo‘l olgan muhojirlar uchun asosiy tranzit yo‘nalishlaridan biri bo‘lib qolayotganini, biroq bu yo‘l katta xavf-xatarlar bilan bog‘liqligini ta’kidlamoqda.
