NATO Ukraina uchun 70 milliard yevrolik yangi harbiy yordam paketini muhokama qilmoqda
Ukrainani qo‘llab-quvvatlash masalasi 7–8 iyul kunlari bo‘lib o‘tadigan NATO sammitining asosiy mavzularidan biri bo‘lishi kutilmoqda.
NATO mamlakatlari Ukraina uchun 70 milliard yevrolik yangi harbiy yordam majburiyatini qabul qilish imkoniyatini ko‘rib chiqmoqda. Mazkur tashabbus alyansning kelasi oy Anqarada bo‘lib o‘tadigan sammitida e’lon qilinishi mumkin.
Politico nashrining NATOdagi diplomatlarga tayanib xabar berishicha, Germaniya tomonidan ilgari surilgan taklif Ukrainaga ajratilayotgan mablag‘lar ustidan nazorat va shaffoflikni kuchaytirishga qaratilgan yangi mexanizmni ham o‘z ichiga oladi.
Tashabbus ayrim davlatlarning Kiyevni qo‘llab-quvvatlash xarajatlari teng taqsimlanmayotgani haqidagi e’tirozlari fonida muhokama qilinmoqda.
Taklifga ko‘ra, 70 milliard yevroning 30 milliard yevrosi Yevropa Ittifoqining avvalroq tasdiqlangan 90 milliard yevrolik kredit dasturidan, qolgan 40 milliard yevro esa NATO a’zolarining ikki tomonlama majburiyatlari hisobidan shakllantiriladi.
Rossiyaning Ukrainaga qarshi keng ko‘lamli urushi beshinchi yilga kirayotgan bir paytda NATO ittifoqchilari Kiyevni qo‘llab-quvvatlashni davom ettirish masalasini muhokama qilmoqda. AQSh prezidenti Donald Tramp ma’muriyati davrida Ukrainaga yangi harbiy yordam deyarli to‘xtatilgan bo‘lib, Vashington hozirda Kiyevga asosan boshqa ittifoqchilar tomonidan moliyalashtirilayotgan qurollarni sotmoqda.
Ukraina prezidenti Volodimir Zelenskiy NATO bosh kotibi Mark Ryutte bilan uchrashuvda Yevropa davlatlarini Patriot havo mudofaa tizimlari uchun raketalar yetkazib berishni ko‘paytirishga chaqirdi. Uning so‘zlariga ko‘ra, mavjud zaxiralarning kamayishi yetkazib berish jarayoniga ta’sir ko‘rsatmoqda.
Kiel instituti ma’lumotlariga ko‘ra, Yevropa davlatlari 2026 yilning yanvar–aprel oylarida Ukrainaga oyiga o‘rtacha 2 milliard yevro harbiy yordam ajratgan. Shu davrda AQSh tomonidan yangi harbiy yordam qayd etilmagan.
Ukrainani qo‘llab-quvvatlash masalasi 7–8-iyul kunlari bo‘lib o‘tadigan NATO sammitining asosiy mavzularidan biri bo‘lishi kutilmoqda. Diplomatlarga ko‘ra, yakuniy qaror NATO mudofaa vazirlari yig‘ilishidan so‘ng qabul qilinishi mumkin.
