Qarshida hokim o‘rinbosarining xodimlarga qo'pol munosabati yuzasidan o‘rganish boshlandi
Xodimlarni dam olish kunlari ishga jalb qilish va ularga nisbatan haqoratli munosabatda bo‘lish haqidagi xabarlar o‘rganilmoqda.
Qarshi shahri hokimining birinchi o‘rinbosari Nurbek Turdiyevning xodimlarga nisbatan qo‘pol munosabatda bo‘lgani hamda ularni dam olish kunlari ishga jalb qilgani haqidagi xabarlar yuzasidan Davlat mehnat inspeksiyasi tomonidan o‘rganish ishlari boshlandi.
Inspeksiyaning ma’lum qilishicha, mazkur holat vakolatli organ tomonidan nazoratga olinib, murojaatlarda keltirilgan holatlar yuzasidan tegishli tekshiruv tadbirlari olib borilmoqda. O‘rganish natijalari bo‘yicha qo‘shimcha ma’lumot taqdim etilishi bildirilgan.
Avvalroq ijtimoiy tarmoqlarda mansabdor shaxs ishtirokidagi videolavha tarqalgan edi. Unda onlayn yig‘ilishga kechikib qo‘shilgan xodimga nisbatan haqoratli va keskin so‘zlar ishlatilgani aks etgan.
Murojaat mualliflari hokim o‘rinbosari tomonidan xodimlarga muntazam ravishda bosim o‘tkazilishi, ularning sha’ni va qadr-qimmatiga putur yetkazuvchi munosabatlarga yo‘l qo‘yilgani hamda ayrim hollarda asossiz ravishda ishdan bo‘shatish holatlari kuzatilganini ta’kidlagan.
Shuningdek, sud qarori bilan ishga tiklanishi belgilangan ayrim xodimlarning amalda o‘z vazifalariga qaytarilmagani yuzasidan ham e’tirozlar bildirilgan.
Davlat mehnat inspeksiyasi mazkur holatlar yuzasidan o‘rganish ishlari davom etayotganini hamda yakuniy xulosalar bo‘yicha jamoatchilikka qo‘shimcha axborot berilishini ma’lum qildi.
