Shavkat Mirziyoyev Prezident Olimpiadasi sport musobaqalarining g‘oliblari va ishtirokchilariga tabrik yo‘lladi

O‘zbekiston Prezidenti Shavkat Mirziyoyev Prezident Olimpiadasi sport musobaqalarining g‘oliblari va ishtirokchilariga tabrik yo‘lladi. Davlat rahbari tabrigida yosh sportchilarning erishgan natijalarini e’tirof etib, ularni kelgusida xalqaro musobaqalarda Vatan sharafini munosib himoya qilishga undadi.

 

Prezident Olimpiada musobaqalari nafaqat sport bellashuvi, balki yoshlar o‘rtasida do‘stlik, o‘zaro hurmat va vatanparvarlik tuyg‘ularini mustahkamlovchi tarbiya maydoni bo‘lganini ta’kidladi.

 

Tabrikda musobaqalarda yuqori natijalarga erishgan sportchilar alohida qayd etildi. Jumladan, qashqadaryolik Kumush Ko‘chkinova dzyudo va kurash bo‘yicha ikkita oltin medalni qo‘lga kiritgan. Toshkentlik Aisha Yenina esa badiiy gimnastika bo‘yicha uchta oltin, bittadan kumush va bronza medaliga sazovor bo‘lgan.

 

Shuningdek, og‘ir atletikachi Mushtariy O‘rolova 60 kilogrammdan yuqori vazn toifasida dast ko‘tarishda 109 kilogramm, siltab ko‘tarishda 136 kilogramm va ikki kurash yakuniga ko‘ra 245 kilogramm natija qayd etib, jahon rekordini o‘rnatgani ta’kidlandi.

 

Bundan tashqari, bir qator yosh sportchilar O‘zbekiston rekordlarini yangilagan. Parasuzish bahslarida andijonlik Hikmatulla Haydaraliyev va qoraqalpog‘istonlik Shahnoza Yerejepbayeva to‘rttadan oltin medalni qo‘lga kiritgan. Sirdaryolik yengil atletikachi Durdona Jumanqulova esa uch kurash bahslarida 2014 ochko jamg‘arib, 14 yoshli sportchilar orasida eng yuqori natijani qayd etgan.

 

Shavkat Mirziyoyev barcha ishtirokchilar musobaqalarda zarur bilim va tajriba orttirganini ta’kidlab, bu bellashuvlarda mag‘lublar bo‘lmaganini qayd etdi.

 

Davlat rahbari yosh sportchilarning kelgusida qit’a va jahon chempionatlari, Olimpiya va Paralimpiya o‘yinlarida ham O‘zbekiston sharafini munosib himoya qilishiga ishonch bildirdi. Shuningdek, sportchilarning ota-onalari, ustoz va murabbiylariga minnatdorlik bildirdi.