Sankt-Peterburgga dronlar hujumi uyushtirildi
Gubernator aholini ehtiyotkorlikka chaqirib, mobil internet uzilishlari mumkinligi haqida ogohlantirdi.
Rossiyaning Sankt-Peterburg shahri 6-iyun kuni ertalab dronlar yordamida amalga oshirilgan keng ko‘lamli hujumga uchradi. Bu haqda shahar gubernatori Aleksandr Beglov ma’lum qildi.
Uning bildirishicha, hujum vaqtida havo mudofaasi tizimlari ishga tushirilgan va zarur xavfsizlik choralari ko‘rilgan. Shuningdek, aholi ehtiyotkorlikka chaqirilib, mobil internet xizmatlarida vaqtinchalik uzilishlar yuzaga kelishi mumkinligi haqida ogohlantirilgan.
Leningrad viloyati gubernatori Aleksandr Drozdenko ma’lumotiga ko‘ra, viloyat hududi ustida 86 ta uchuvchisiz uchish apparatlari yo‘q qilingan.
Rossiya Mudofaa vazirligi esa mamlakatning turli hududlari ustida jami 376 ta dron urib tushirilganini ma’lum qilgan. Hujumlar Belgorod viloyati, Bryansk viloyati, Kaluga viloyati, Kursk viloyati, Novgorod viloyati, Orel viloyati va Pskov viloyati hududlarida ham qayd etilgani bildirilgan.
Belgorod viloyatida Ukraina Qurolli Kuchlari tomonidan amalga oshirilgan hujumlar natijasida bir kishi halok bo'lgan va yana biri yaralangan.
