AQSH Eronning quruqlikdagi ta’minot yo‘llarini ham to‘smoqchi: maxsus guruh tuzildi
AQSH Eronning dengizdagi ta’minot yo‘llariga qo‘yilgan blokadani quruqlikdagi yo‘nalishlarga ham kengaytirmoqda.
AQSH Eronning qurol-yarog‘ va boshqa materiallarni quruqlik orqali tashishiga to‘sqinlik qilish uchun Iron Gate maxsus guruhini tashkil etdi. Bu haqda AQSH Markaziy qo‘mondonligi (CENTCOM) ma’lum qildi, deya yozdi Al Jazeera.
Yangi tuzilma AQSHning Hormuz bo‘g‘ozidagi Eron portlariga nisbatan dengiz blokadasini kengaytirish doirasida tashkil etilgan. Guruh Florida shtatining Tampa shahrida joylashadi va AQSH hukumatining boshqa idoralari bilan hamkorlik qiladi.
CENTCOM ma’lumotiga ko‘ra, maxsus guruh Eronning quruqlikdagi chegaralari va Kaspiy dengizi orqali qurol tizimlari, ikki maqsadda foydalaniladigan texnologiyalar, sanksiyalar ostidagi materiallar hamda noqonuniy daromadlar harakatini to‘xtatish bilan shug‘ullanadi.
AQSH mudofaa vazirining Yaqin Sharq bo‘yicha sobiq o‘rinbosari Maykl Malroyning fikricha, guruh qurol-yarog‘ yetkazib berish yo‘llarini aniqlash va ularni to‘sish imkoniyatlarini o‘rganadi. Uning ta’kidlashicha, AQSH prezidenti Donald Tramp urushni kengaytirishga qaror qilsa, navbatdagi zarbalar Eronning iqtisodiy va infratuzilmaviy obyektlariga qaratilishi mumkin.
Shu bilan birga, CENTCOM shanba kuni Ummon ko‘rfazida Eron portlariga nisbatan joriy etilgan blokadaga bo‘ysunmagan savdo kemasini ishdan chiqarganini bildirdi. Sent-Kits va Nevis bayrog‘i ostida suzayotgan M/V Huda kemasining orqa qismiga AQSH harbiy samolyoti zarba bergan.
Qo‘mondonlik ma’lumotiga ko‘ra, iyul oyidan buyon AQSH kuchlari blokada doirasida 147 ta tijorat kemasining yo‘nalishini o‘zgartirgan, talablarni bajarmagan beshta savdo kemasini esa ishdan chiqargan.
Boshqa tomondan, Eronning IRNA axborot agentligi shanba kuni Qeshm orolida ikkita, Jask, Sirik va Bandar-Abbos shaharlarida esa bir nechta portlash ovozi eshitilganini xabar qildi. AQSH prezidenti Donald Tramp bir kun avval Qeshm oroliga yangi zarbalar berilganini tasdiqlagan, biroq ularni «kichik» deb atagan edi.
Eron Islom inqilobi qo‘riqchilari korpusi Harbiy-dengiz kuchlari esa Hormuz bo‘g‘ozi yaqinida ikkita neft tankeriga dengiz minalari tegganini ma’lum qildi. Eron davlat televideniyesiga ko‘ra, navigatsiya tizimlarini o‘chirgan holda bo‘g‘ozning xavfli qismidan o‘tgan tankerlar jiddiy shikastlanib, harakatdan to‘xtagan.
