Rossiya Ukrainaga yangi zarba berishga tayyorlanmoqda — Zelenskiy
Ukraina prezidenti Ukraina Havo kuchlari va Qurolli kuchlari ehtimoliy hujumdan himoyalanishga tayyorgarlik ko‘rayotganini bildirdi.
Rossiya Ukraina energetika va fuqarolik infratuzilmasi obyektlariga, shuningdek, Dnepr daryosi ustidan o‘tgan ko‘priklarga yangi zarba berishni rejalashtirmoqda. Bu haqda Ukraina prezidenti Volodimir Zelenskiy razvedka ma’lumotlariga tayanib ma’lum qildi.
Uning so‘zlariga ko‘ra, Ukraina Havo kuchlari va Qurolli kuchlari ehtimoliy hujumdan himoyalanishga tayyorgarlik ko‘rmoqda. Biroq bu oson bo‘lmasligi ta’kidlangan.
Zelenskiy havo mudofaasini kuchaytirish uchun «Patriot» tizimlariga mo‘ljallangan tutib qoluvchi raketalar zarurligini bildirdi. Shuningdek, u xalqaro hamkorlarni harbiy yordam va qurol-yarog‘ yetkazib berishni kechiktirmaslikka chaqirdi.
Ukraina prezidenti Rossiyaning asosiy taktikasi elektr tarmoqlari, transformatorlar va elektr energiyasini taqsimlash qurilmalarini yo‘q qilishdan iborat ekanini qayd etdi.
Uning ta’kidlashicha, ayrim hududlarda elektr energiyasi ishlab chiqarish hajmi yetarli bo‘lsa-da, infratuzilmaga yetkazilgan zarar tufayli elektr ta’minotida taqchillik saqlanib qolmoqda. Mavjud muammolarni bartaraf etishda ta’mirlash ishlarini tezkor amalga oshirish muhim ahamiyatga ega.
