Xomanaiy Tramp bilan uchrashmaydi
Tehron AQSH prezidenti bilan Eron oliy rahbari o‘rtasida uchrashuv o‘tkazilishi rejalashtirilmaganini ma’lum qildi.
Eron oliy rahbarining harbiy maslahatchisi Mohsen Rizoiy Donald Tramp va Xomanaiy o‘rtasida uchrashuv bo‘lib o‘tishi ehtimolini rad etdi.
Mohsen Rizoiy CNN telekanaliga bergan intervyusida mazkur masalaga izoh berar ekan, hozirgi sharoitda bunday uchrashuv rejalashtirilmaganini ta’kidlagan.
“Bu sodir bo‘lmaydi. Hozir biz muzokaralarning birinchi bosqichidamiz va janob Tramp muzokaralarni to‘xtatib qo‘ydi. Shu sababli bunday uchrashuv bo‘lmaydi”, degan u.
Avvalroq Donald Tramp Yaqin Sharqdagi vaziyat yuzasidan kelishuvga erishilgan taqdirda Eron oliy rahbari bilan uchrashish ehtimolini istisno qilmagandi. AQSH prezidenti hatto tomonlar o‘rtasida muloqot uchun imkoniyat mavjudligini ham qayd etgan edi.
Biroq Eron tomoni hozircha bunday uchrashuv masalasi kun tartibida emasligini bildirib, muzokaralar jarayonining dastlabki bosqichida ekanini ma’lum qilgan.
