Ebola epidemiyasiga qarshi kurash uchun 518 million dollar ajratiladi
Kongoda bir kunning o‘zida 71 ta yangi holat aniqlangan bo‘lib, rasmiylar buni “jamiyat ichida faol tarqalish” belgisi deb baholagan.
Kongo Demokratik Respublikasida Ebola virusining Bundibugyo turi tarqalishi davom etar ekan, mamlakatda tasdiqlangan holatlar soni 488 taga, vafot etganlar soni esa 86 nafarga yetdi. Bu haqda mamlakat sog‘liqni saqlash organlariga tayanib, AP xabar berdi.
Rasmiy ma’lumotlarga ko‘ra, payshanba kuni bir sutkaning o‘zida 71 ta yangi holat qayd etilgan. Mutaxassislar buni kasallikning aholi orasida faol tarqalayotganidan dalolat beruvchi xavotirli ko‘rsatkich sifatida baholamoqda.
Qo‘shni Ugandada ham Ebola bilan bog‘liq 19 ta tasdiqlangan holat va ikki o‘lim qayd etilgan.
Jahon sog‘liqni saqlash tashkiloti bosh direktori Tedros Gebreyesusning ta’kidlashicha, epidemiya bir necha hafta davomida aniqlanmasdan tarqalgan. Mintaqadagi shifoxonalarda Ebola virusining aynan ushbu turini aniqlash imkoniyatlari bo‘lmagani sababli kasallik kengroq yoyilib ketgan.
Bundibugyo turidagi Ebola uchun hozircha tasdiqlangan vaksina yoki maxsus davolash usuli mavjud emas. Shunga qaramay, Kongo hukumati epidemiya rasman tasdiqlanganidan buyon kamida besh nafar bemor sog‘ayganini ma’lum qilgan.
Vaziyatning jiddiylashuvi fonida Jahon sog‘liqni saqlash tashkiloti Ebola tarqalishini jilovlash uchun 518 million dollarlik xalqaro reja ishga tushirilganini e’lon qildi. Tedros Gebreyesusga ko‘ra, kasallikni nazorat ostiga olish siyosiy iroda, barqaror moliyalashtirish hamda mahalliy aholi ishonchi va hamkorligiga bog‘liq.
Mutaxassislar epidemiyaga qarshi kurashga Kongo sharqidagi xavfsizlik bilan bog‘liq vaziyat ham salbiy ta’sir ko‘rsatayotganini qayd etmoqda. Xususan, hukumat kuchlari bilan M23 isyonchi guruhi o‘rtasidagi to‘qnashuvlar va qurolli hujumlar yordam yetkazish hamda tibbiy xizmatlarni tashkil etishni murakkablashtirmoqda.
