Eron yadroviy qurolga ega bo‘lishiga hech qachon yo‘l qo‘ymaymiz — Tramp

 

AQSh prezidenti Donald Tramp NBC News telekanaliga bergan intervyusida Eron bilan ehtimoliy yadroviy kelishuv bo‘yicha Vashingtonning pozitsiyasini keskinroq shaklda bayon qildi. U AQSh Eronning yuqori darajada boyitilgan uran zaxiralarini “kelishuv bo‘lsa ham, bo‘lmasa ham” nazorat ostiga olishi va yo‘q qilishini ma’lum qilgan.

 

“Agar kelishuvga erishsak va munosabatlarni yo‘lga qo‘ysak, buni birgalikda amalga oshiramiz. Uranni olib tashlaymiz va uni joyida yoki tashqarida yo‘q qilamiz. Va biz u yerga ular bilan yoki ularsiz boramiz”, degan Tramp.

 

U, shuningdek, kelishuv bo‘lmagan taqdirda AQSh Eronga nisbatan “juda qattiq harbiy zarba” berishga tayyorligini aytgan.

Tramp Eronning amaldagi rahbariyati avvalgisiga qaraganda “oqilona va juda aqlli” ekanini aytgan hamda Oliy rahbar Mojtabo Xomanaiy ehtimoliy kelishuvni tasdiqlash jarayonida “ishtirok etayotganini” bildirgan. U yangi rahbar bilan to‘g‘ridan to‘g‘ri muloqot qilishga tayyorligini ham qo‘shimcha qilgan.

 

“Yoshroq. Menimcha, oqilonaroq. U yaralangan, jiddiy yaralangan. Shunday bo‘lsa ham AQSh bilan ishlar qanday ketayotganini so‘rayapti — bunda ma’lum jasorat bor”, deya ta'kidlagan Tramp.

 

AQSh prezidenti Eronning raketa va dron salohiyati haqida ham keskin da’vo qilgan:

“Biz ularning harbiy kuchlarini butunlay yo‘q qildik. Ularda bir nechta raketalar qoldi. Bir nechta dronlar”, dedi Tramp va Eron urushdan oldingi raketa zaxirasining atigi “21–22 foizi” qolganini taxmin qilgan.

 

Tramp Eron bilan kelishuvga “juda yaqin” qolinganini aytgan, biroq Vashington endi faqat “yadroviy qurol ishlab chiqarmaslik” emas, balki yadroviy qurolni sotib olmaslik, boyitilgan uranni topshirish va Hormuz bo‘g‘ozi bo‘yicha qo‘shimcha majburiyatlarni ham talab qilmoqda. Tehron esa muzlatilgan aktivlarni yechish va ayrim qat’iy talablarning yumshatilishini kelishuv uchun muhim shart deb hisoblamoqda.