Tramp har bir katta yoshli amerikalikka 5 ming dollardan berishni vaʼda qildi

Tramp bu haqda Texas shtatining Dallas shahrida bo‘lib o‘tgan Respublikachilar milliy anjumanidagi nutqida maʼlum qildi. Uning taʼkidlashicha, mazkur to‘lovlar AQSH iqtisodiyotidagi muvaffaqiyatlar natijasida shakllanadigan dividend sifatida beriladi.

Prezident bu tizimni muvaffaqiyatli kompaniyalarning o‘z investorlariga dividend to‘lashiga qiyosladi. Shuningdek, mablag‘lar AQSH hududida sarflanishi kerakligini taʼkidladi.

Hozircha ushbu to‘lovlarni amalga oshirish mexanizmi, mablag‘larni kimlar olishi va bunday tashabbusning huquqiy asoslari haqida aniq maʼlumot berilmagan.

2025-yilda AQSHning voyaga yetgan aholisi taxminan 267 million kishini tashkil etgan. Agar ularning barchasiga 5 ming dollardan to‘lansa, xarajat qariyb 1,34 trillion dollarni tashkil etadi. Biroq mamlakatdagi barcha voyaga yetganlar AQSH fuqarosi emas.

Tramp, shuningdek, oraliq saylovlarda prezident partiyasi odatda Kongressdagi o‘rinlarni yo‘qotishini eslatib, respublikachilar bu tendensiyani o‘zgartirishi kerakligini aytdi. U saylovchilarni partiyasini qo‘llab-quvvatlashga chaqirdi.

Prezident Respublikachilar partiyasi saylovlarda mag‘lub bo‘lgan taqdirda AQSHning chegaralar, soliq imtiyozlari va xavfsizlik borasidagi siyosati xavf ostida qolishini taʼkidladi.