Suriyaning Idlib viloyatida qurol ombori portladi: 14 kishi halok bo‘ldi
Rasmiylar hodisaga nima sabab bo‘lganini hozircha ma’lum qilmadi.
Suriyaning Idlib viloyatidagi Sarmada shahri yaqinida qurol-yarog‘ va urushdan qolgan o‘q-dorilar saqlanadigan vaqtinchalik omborda portlash yuz berdi. Hodisa oqibatida kamida 14 kishi halok bo‘lgan, 11 kishi jarohatlangan.
Portlash 9-sentyabr kuni Idlib viloyatining shimolidagi Burj an-Nimra qishlog‘ida sodir bo‘lgan. Portlashdan keyin omborda yong‘in kelib chiqqan va hududni bir necha soat davomida quyuq tutun qoplagan.
Favqulodda xizmatlar voqea joyiga yetib kelgan, biroq ikkilamchi portlashlar yong‘inni o‘chirish ishlariga xalaqit bergan. Qutqaruvchilar vayronalar ostida qolgan odamlarni izlamoqda.
Suriya Mudofaa vazirligi ma’lumotiga ko‘ra, jarohatlanganlar orasida harbiy xizmatchilar ham bor. Portlagan ombor 2011–2024-yillarda davom etgan Suriya qo‘zg‘oloni va fuqarolar urushidan qolgan qurol-yarog‘ hamda o‘q-dorilarni saqlash uchun ishlatilgan.
Hozircha rasmiylar portlashga nima sabab bo‘lganini ma’lum qilmagan.
Avvalroq, 1-sentyabr kuni Idlib viloyatining Binnish shahrida o‘q-dorilar ortilgan avtomobil portlashi oqibatida besh kishi halok bo‘lgan va yana bir necha kishi jarohatlangan edi.
