“Jonli konteyner”: 555 gramm oltin tanaga yashirildi
Hindistonga uchib ketmoqchi bo‘lgan 5 nafar fuqaroning ichki organlaridan jami 555 gramm quyma oltin va 200 gramm zargarlik buyumlari aniqlandi.
Davlat xavfsizlik xizmatining Namangan viloyati bo‘yicha boshqarmasi hamda viloyat Bojxona boshqarmasi xodimlari hamkorligida Namangan aeroportida tezkor tadbir o‘tkazildi.
Tadbir davomida “Namangan – Dehli” yo‘nalishi bo‘yicha Hindistonga uchib ketmoqchi bo‘lgan Andijon va Farg‘ona viloyatlarida yashovchi 5 nafar fuqaro maxsus tekshiruvdan o‘tkazilgan.
Tekshiruv natijasida fuqarolar o‘zlarining ichki organlaridan foydalanib, jami 555 gramm quyma oltin bo‘laklari hamda 200 gramm zargarlik buyumlarini yashirin ravishda xorijga olib chiqishga uringanliklari aniqlangan.
Dastlabki hisob-kitoblarga ko‘ra, aniqlangan qimmatbaho metallarning umumiy taxminiy qiymati 1,1 mlrd so‘mni tashkil etadi.
Holat yuzasidan hozirda tergovga qadar tekshiruv ishlari olib borilmoqda.
