“Sizlar halol emassiz” — Tramp NBC jurnalisti bilan tortishdi
Tramp NBC telekanaliga bergan intervyusi davomida saylovlar masalasida jurnalist bilan bahslashib, NBC, ABC, CBS va CNN telekanallarini “bir tomonlama va halol bo‘lmagan OAV” deb atadi va intervyuni to'xtatdi.
AQSh prezidenti Donald Tramp NBC telekanaliga bergan intervyusi davomida boshlovchi bilan keskin bahsga kirishib, intervyuni to'xtatdi.
Intervyu chog‘ida Tramp AQShdagi saylovlar mavzusiga to‘xtalib, avval ham bir necha bor bildirgan fikrlarini takrorlagan. U saylov jarayonlarida qonunbuzarliklar bo‘lganini da’vo qilib, buni “adolatsiz va soxtalashtirilgan saylovlar” deb atagan.
Jurnalist prezidentdan ushbu da’volarni tasdiqlovchi dalillar mavjud yoki mavjud emasligini so‘ragan. Shundan so‘ng suhbat keskin tus olgan.
“Saylovlar soxtalashtirilganini siz ham bilasiz. Sizning telekompaniyangiz ham buni biladi”, degan Tramp.
AQSh prezidenti, shuningdek, mamlakatdagi saylov tizimini tanqid qilib, AQShni bu borada “uchinchi dunyo mamlakatlariga o‘xshatgan”. U NBC telekanali va uning mashhur “Meet the Press” dasturini, shuningdek, boshqa yirik Amerika telekanallari — ABC, CBS va CNN’ni ham biryoqlama yondashuvda ayblagan.
“Sizlar halol emassiz. ‘Meet the Press’ halol emas. Xuddi ABC, CBS va CNN kabi — ular bir tomonlama va halol bo‘lmagan telekanallardir”, deya ta'kidlagan Tramp.
Bahs davomida prezident intervyuni yakunlashni so‘ragan. Boshlovchi suhbatni davom ettirishga uringan va Trampdan yana bir necha savolga javob berishni iltimos qilgan. Biroq AQSh rahbari qarorini o‘zgartirmagan va intervyuni to‘xtatgan.
