Turkiyada ota 3 yoshli qizini derazadan uloqtirmoqchi bo‘ldi
Erkak turmush o‘rtog‘i bilan yuzaga kelgan oilaviy kelishmovchilikdan so‘ng qizini pichoq bilan garovga olgan.
Turkiyaning Anqara shahrida ota o‘zining 3 yoshli qizini garovga olib, uni derazadan uloqtirish bilan tahdid qildi. Hodisa 5-iyun kuni Etimesgut tumani Piyoda mahallasidagi ko‘p qavatli uylarning birida sodir bo‘lgan. Bu haqda “Milliyet” nashri xabar berdi.
Ma’lumotlarga ko‘ra, erkak turmush o‘rtog‘i bilan yuzaga kelgan oilaviy kelishmovchilikdan so‘ng qizini pichoq bilan garovga olgan. Voqeaga guvoh bo‘lgan fuqarolar uy derazasida qo‘lida pichoq bilan bolani ushlab turgan erkakni ko‘rib, favqulodda xizmatlarga murojaat qilgan.
Shundan so‘ng voqea joyiga ko‘plab polisiya, tez tibbiy yordam va yong‘in-qutqaruv ekipajlari jalb etilgan. Huquq-tartibot organlari xodimlari erkakni bolani qo‘yib yuborishga ko‘ndirishga uringan, biroq muzokaralar samara bermagan.
Natijada maxsus operatsiya kuchlari tomonidan o‘tkazilgan tadbir davomida gumonlanuvchi zararsizlantirilgan. Uch yoshli qiz qutqarilib, tibbiy ko‘rik uchun shifokorlar nazoratiga topshirilgan. Erkak esa jarohatlangan holda shifoxonaga olib ketilgan.
Polisiya ma’lumotiga ko‘ra, operatsiya davomida xizmat itlaridan biri ham yaralangan. Hozirda uning davolanishi davom etmoqda.
