Afg‘onistonda davlat xizmatchilariga smartfonlardan foydalanish taqiqlandi
Taqiqni buzgan amaldorlar harbiy sudga tortilishi mumkin.
Tolibon harakati yetakchisi Haybatulloh Oxundzoda davlat xizmatchilari va guruh a’zolariga smartfonlardan foydalanishni taqiqlovchi farmon chiqardi. Bu haqda Afghaniston International xabar berdi.
Hujjatga ko‘ra, taqiq barcha hukumat xodimlariga tatbiq etiladi va uning bajarilishi maxsus harbiy sudlar hamda xavfsizlik idoralari tomonidan nazorat qilinadi. Qoidani buzgan shaxslar “huquqbuzar” sifatida baholanib, harbiy sudga tortilishi mumkin.
Ma’lumotlarga ko‘ra, Adliya vazirligi ushbu farmonni mamlakatning sakkizta hududiy zonasida harbiy sudlar rahbarlariga yetkazgan. Shuningdek, politsiya bo‘limlari va xavfsizlik xizmatlari rahbarlari ham tegishli ko‘rsatmalar bilan tanishtirilgan.
Nazoratni ta’minlash maqsadida maxsus reyestr tuzilgan bo‘lib, unda har bir xodimning ismi, lavozimi, ish joyi, aloqa ma’lumotlari hamda telefon raqamlari qayd etiladi. Mansabdor shaxslar barcha xodimlar ushbu taqiq haqida xabardor qilinganini tasdiqlashlari shart ekani bildirilgan.
Avvalroq, Afg‘onistonda universitet o‘qituvchilariga ish vaqtida smartfonlardan foydalanish taqiqlangani ma’lum qilingan edi.
