O‘zbekiston Niderlandiyaga 2:1 hisobida mag‘lub bo‘ldi
Nyu-Yorkda bo'lib o'tgan o‘rtoqlik uchrashuvida Niderlandiya Kodi Gakponing dubli evaziga g'alaba qozondi.
O‘zbekiston milliy terma jamoasi Jahon chempionatiga tayyorgarlik doirasida o‘tkazilgan o‘rtoqlik uchrashuvida Niderlandiyaga 2:1 hisobida mag‘lub bo‘ldi.
AQShning New York City shahridagi “Icahn” stadionida bo‘lib o‘tgan bahsning birinchi bo‘limi niderlandiyalik futbolchilarning ustunligi ostida kechgan. Uchrashuvning 31-daqiqasida o‘zbekistonlik himoyachi Jahongir O‘rozov jarima maydoni ichida qoida buzgan va hakam penalti belgilagan. 32-daqiqada Kodi Gakpo ushbu imkoniyatdan unumli foydalanib, hisobni ochgan.
Ikkinchi bo‘limda O‘zbekiston terma jamoasi o‘yin tashabbusini qo‘lga olishga harakat qilgan. Bahsning 86-daqiqasida Niderlandiya futbolchilaridan biri qo‘l bilan o‘ynagani uchun maydondan chetlatilgan. Shundan so‘ng o‘zbekistonlik futbolchilar son jihatdan ustunlikka ega bo‘lgan.
Uchrashuvning asosiy vaqtiga qo‘shib berilgan daqiqalarda O‘zbekiston bosimni kuchaytirgan va 90+1-daqiqada Igor Sergeyev raqib darvozasini ishg‘ol qilib, hisobni tenglashtirgan.
Biroq bahsning so‘nggi soniyalarida yana penalti belgilangan. 90+7-daqiqada Kodi Gakpo ikkinchi bor aniq zarba yo‘llab, dubl muallifiga aylangan va jamoasiga g‘alaba keltirgan.
Shu tariqa, O‘zbekiston terma jamoasi Jahon chempionati oldidan o‘tkazilgan navbatdagi nazorat uchrashuvini mag‘lubiyat bilan yakunladi.
Avvalroq “oq bo‘rilar” Kanada terma jamoasiga ham 2:0 hisobida imkoniyatni boy bergan edi.
