O‘zbekiston TIV xorijdagi fuqarolar uchun konsullik xizmatlari mobil ilovasini ishga tushirdi
Xorijdagi elchixona va konsulliklar haqidagi barcha ma’lumotlar yagona mobil ilovada jamlandi.
O‘zbekiston Tashqi ishlar vazirligi xorijda istiqomat qilayotgan hamda chet elga safar qilishni rejalashtirayotgan fuqarolar uchun yangi konsullik xizmatlari mobil ilovasini ishga tushirdi.
Mazkur ilova konsullik masalalarini masofadan turib hal etish, zarur ma’lumotlarni tezkor olish va davlat xizmatlaridan qulay foydalanish imkonini yaratish maqsadida ishlab chiqilgan.
Ilova orqali foydalanuvchilar O‘zbekistonning xorijdagi barcha diplomatik vakolatxonalari va konsullik muassasalarining manzili, geolokatsiyasi hamda aloqa ma’lumotlarini bir joyda topishlari mumkin. Shuningdek, maxsus “Konsullik okruglari” funksiyasi yordamida qaysi davlat yoki hudud uchun mas’ul diplomatik vakolatxona xizmat ko‘rsatishini aniqlash imkoniyati yaratilgan.
Yangi platforma orqali fuqarolar ayrim konsullik xizmatlariga masofadan murojaat qilishlari mumkin. Jumladan, Vatanga qaytish sertifikatini rasmiylashtirish, vaqtinchalik va doimiy konsullik hisobiga turish bo‘yicha arizalarni elektron shaklda yuborish imkoniyati mavjud. Vazirlik kelgusida xizmatlar ro‘yxatini bosqichma-bosqich kengaytirishni rejalashtirmoqda.
Shuningdek, ilovada ariza va anketalarni to‘ldirish jarayonini yengillashtiruvchi avtomatik ma’lumot kiritish tizimi joriy etilgan bo‘lib, u majburiy maydonlarning qariyb 80 foizini avtomatik to‘ldirish imkonini beradi.
Bundan tashqari, ilovaga xorijiy davlatlarga kirish uchun viza talablari bo‘yicha ma’lumot beruvchi maxsus axborot bo‘limi ham qo‘shilgan. Hozirda ushbu xizmat sinov rejimida ishlamoqda va ma’lumotlar bazasi muntazam ravishda yangilanib boriladi.
TIV ma’lumotiga ko‘ra, mobil ilova barcha foydalanuvchilar uchun bepul taqdim etiladi.
