Qozog‘istonda mansabdor shaxs soxta “tozalash” surati sabab ishdan bo'shatildi
Amaldor sun’iy intellekt yordamida tahrirlangan suratlarni haqiqiy obodonlashtirish ishlari natijasi sifatida taqdim etgan.
Qozog‘istonning Olmaota shahrida sun’iy intellekt yordamida tahrirlangan suratlarni haqiqiy obodonlashtirish ishlari natijasi sifatida taqdim etgan mansabdor shaxs ishdan bo‘shatildi. Bu haqda NUR.KZ nashri xabar berdi.
Ma’lum qilinishicha, may oyida ijtimoiy tarmoq foydalanuvchilaridan biri Bostandiq tumanidagi hududda uzoq vaqt davomida yig‘ilib qolgan chiqindilar aks etgan suratlarni e’lon qilgan. Shundan so‘ng tuman hokimligi murojaatga javoban hudud tozalangani haqida fotosuratlarni taqdim etgan.
Biroq ijtimoiy tarmoq foydalanuvchilari ushbu suratlar sun’iy intellekt yordamida tahrirlanganini payqagan. Platforma ham rasmlarni “AI-generated” (sun’iy intellekt yordamida yaratilgan) deb belgilagan.
Shundan so‘ng Bostandiq tumani hokimligi tomonidan holat yuzasidan tekshiruv o‘tkazilgan. Hokimlik matbuot xizmatiga ko‘ra, mas’ul davlat xizmatchisi suratlarni tayyorlashda sun’iy intellektdan foydalanganini tan olgan.
Natijada mazkur xodim bilan tuzilgan mehnat shartnomasi bekor qilinib, uning davlat organidagi faoliyatiga yakun yasalgan. Hokimlik vakillari xodim aybini tan olgani sababli qo‘shimcha xizmat tekshiruvini o‘tkazishga ehtiyoj qolmaganini ma’lum qilgan.
Mahalliy hokimiyat ushbu masala yopilganini va qo‘shimcha rasmiy tartib-taomillar talab etilmasligini bildirgan.
