Farg‘onada 7-sinf o‘quvchisi otasining mashinasida YTH sodir etdi
Bola avtomobilni uyda qarovsiz qoldirilgan holatda ruxsatsiz olib chiqqan.
Farg‘ona viloyatining Buvayda tumanida 7-sinf o‘quvchisi tomonidan avtomobil boshqarilib, yo‘l-transport hodisasi sodir etildi.
Yo'l harakati xavfsizligi xizmati ma’lumotlarga ko‘ra, 2026-yil 23-may kuni soat 15:00 larda “Teplik” mahalla fuqarolar yig‘ini hududida voyaga yetmagan, 7-sinf o‘quvchisi otasiga tegishli bo‘lgan “Kia Sorento” rusumli avtomobilni uyda qarovsiz qoldirilgan holatda ruxsatsiz olib chiqqan.
O‘quvchi mahalla hududida transport vositasini tezlikda boshqarish chog‘ida boshqaruvni yo‘qotib, yo‘l-transport hodisasiga sabab bo‘lgan. Hodisa oqibatida hech kim tan jarohati olmagan, faqat avtomobilga texnik shikast yetgan.
Hozirda mazkur holat yuzasidan Buvayda tumani Ichki ishlar bo‘limi Yo‘l harakati xavfsizligi xizmati xodimlari tomonidan o‘rganish ishlari olib borilmoqda.
