Jurnalist jonli efirni tashlab, Shakira tomon yugurdi
U kolumbiyalik xonanda bilan suratga tushmoqchi bo‘lgan.
2026-yilgi futbol bo‘yicha Jahon chempionati ochilish o‘yini arafasida argentinalik jurnalist Marselo Benedetto jonli efir vaqtida kolumbiyalik xonanda Shakira bilan suratga tushish uchun reportajni vaqtincha to‘xtatib qo‘ydi.
Hodisa Meksikadagi Atsteka stadionida yuz bergan. Jurnalist ochilish marosimiga tayyorgarlik jarayonlari haqida efir olib borayotgan paytda Shakiraning maydonga chiqayotganini payqab qolgan. Shundan so‘ng u hamkasblariga “Uning ortidan boraman” deya mikrofonni qoldirib, xonanda tomon yo‘l olgan.
Mahalliy OAV ma’lumotlariga ko‘ra, Benedetto Shakiraga yaqinlashib, undan selfi tushishni so‘ragan. Xonanda jurnalistning iltimosini rad etmagan va ular birgalikda suratga tushgan.
Keyinchalik muxbir efirga qaytib, o‘zining bu harakatini hazil aralash izohlagan. Voqea aks etgan video ijtimoiy tarmoqlarda tez tarqalib, foydalanuvchilar orasida keng muhokama qilindi.
Ijtimoiy tarmoq foydalanuvchilari jurnalistning bundan avval ham yirik xalqaro tadbirlar chog‘ida mashhurlar bilan suratga tushishga muvaffaq bo‘lganini eslatib o‘tgan.
