Toshkentda xavfli harakatlanib, bir nechta mashinani pachoqlab ketgan Cobalt o‘q uzib to‘xtatildi
IIO xodimlari boshqa fuqarolarga zarar yetkazilishining oldini olish maqsadida tabelli quroldan foydalandi.
Toshkent shahrida yo‘l harakati qoidalarini qo‘pol ravishda buzib, boshqa harakat ishtirokchilarining hayotiga xavf tug‘dirgan Cobalt rusumli avtomobil haydovchisining noqonuniy harakatlariga chek qo‘yildi. Bu haqda Yo'l harakati xavfsizlik xizmati matbuot xizmati xabar berdi.
Ma’lum qilinishicha, 11-iyun kuni soat 21:34 lar atrofida 1982-yilda tug‘ilgan fuqaro ruhiy-asab kasalliklari shifoxonasida ro‘yxatda turuvchi R.Y. o‘z boshqaruvidagi Cobalt avtomashinasida Yakkasaroy tumanidagi Shota Rustaveli ko‘chasi bo‘ylab harakatlanib, yo‘l harakati qoidalarini buzgan holda boshqa fuqarolar hayotini xavf ostiga qo‘ygan.
Haydovchi ichki ishlar organlari xodimlarining to‘xtash haqidagi qonuniy talabiga bo‘ysunmasdan, harakatni davom ettirgan hamda bir nechta transport vositalariga texnik shikast yetkazgan.
Ko‘rilgan tezkor choralar natijasida boshqa fuqarolarga zarar yetkazilishining oldini olish maqsadida ichki ishlar organlari xodimlari tomonidan tabelli quroldan foydalanilgan. Ogohlantirish berilgach, avtomobil g‘ildiragiga o‘q uzilib, transport vositasi to‘xtatilgan va haydovchining keyingi noqonuniy harakatlariga barham berilgan.
Hozirda mazkur holat yuzasidan Toshkent shahar IIBB tomonidan tergovga qadar tekshiruv ishlari olib borilmoqda.
