22 ming dollar evaziga AQSHga yuborishni va’da qilgan shaxs ushlandi
Shuningdek, Janubiy Koreyaga ishchi viza olib berishni va’da qilib, 6 ming dollar talab qilgan ayol qo'lga olindi.
Noqonuniy migratsiyaga qarshi kurashish yo‘nalishida Davlat xavfsizlik xizmati, Iqtisodiy jinoyatlarga qarshi kurashish departamenti hamda ichki ishlar organlari hamkorligida o‘tkazilgan tezkor tadbirlar davomida xorijga ishga yuborish bilan bog‘liq firibgarlik holatlari fosh etildi. Bu haqda DXX Zamon.uz'ga xabar berdi.
Aniqlanishicha, Toshkent viloyatining Chinoz tumanida yashovchi, 1969-yilda tug‘ilgan va muqaddam bir necha marotaba sudlangan shaxs poytaxtda istiqomat qiluvchi fuqaroning ishonchiga kirib, uni mansabdor tanishlari orqali AQSHga ishchi viza asosida yuborishni va’da qilgan. Buning evaziga 22 ming AQSH dollari talab qilgan shaxs oldindan 5 ming AQSH dollarini olgan vaqtida ashyoviy dalillar bilan qo‘lga olingan.
Shuningdek, Andijon viloyatining Izboskan tumanida yashovchi 1993-yilda tug‘ilgan fuqaro Asaka tumanida istiqomat qiluvchi yigitga Janubiy Koreyaga ishchi viza rasmiylashtirib berish va ishga yuborishni va’da qilib, 6 ming AQSH dollari talab qilgan. U oldindan 3 ming AQSH dollarini olgan vaqtida tezkor tadbir davomida ushlangan.
Tergovga qadar tekshiruv jarayonida mazkur shaxs avval ham boshqa bir fuqaroni Janubiy Koreyaga ishga yuborishni va’da qilib, undan pul olgani aniqlangan.
Hozirda har ikki holat yuzasidan jinoyat ishlari qo‘zg‘atilib, tergov harakatlari olib borilmoqda.
