Rossiya mehnat bozorida o‘zbekistonliklar yetakchi: to‘qqiz oylik statistika e’lon qilindi
To‘qqiz oyda 1,5 milliondan ortiq fuqaro ushbu maqsadda mamlakatga kirgan.

2026-yil yanvar–sentabr oylarida 1 535 026 nafar O‘zbekiston fuqarosi Rossiyaga ishlash maqsadida kelgan. Bu ko‘rsatkich bilan o‘zbekistonliklar Rossiyaga ish izlab kelgan xorijiy fuqarolar orasida birinchi o‘rinni egallagan. Bu haqda TASS agentligi ko‘rib chiqqan ma’lumotlarda keltirilgan.
Ushbu ro‘yxatda ikkinchi o‘rinni Tojikiston fuqarolari egallagan — 665 892 kishi. Uchinchi o‘rinda esa 289 061 nafar fuqaro bilan Qirg‘iziston qayd etilgan.
Birinchi beshlikdan, shuningdek, Qozog‘iston (176 037 nafar) va Xitoy (127 176 nafar) fuqarolari ham joy olgan.
Rossiyada ishlash maqsadida bo‘lgan boshqa xorijliklar orasida Armaniston (111 235), Ozarbayjon (83 991), Hindiston (38 816), Turkmaniston (19 038) va Turkiya (12 873) fuqarolari ham bor.
O‘zbekiston fuqarolari 2025-yilda ham Rossiyaga ishlash uchun kelgan xorijliklar orasida yetakchilik qilgan. O‘tgan yilning yanvar–sentabr oylarida bu maqsadda Rossiyaga 1 771 406 nafar o‘zbekistonlik kirgan. Bu 2026-yilning shu davridagi ko‘rsatkichdan 236 380 nafarga ko‘p.








