Qashqadaryoda soxta prokuror ushlandi
U zaxiradagi kichik serjant bo‘lib, fuqaroni ishga kiritib qo‘yishni va’da qilgan.
Qashqadaryo viloyatida fuqaroni ishga joylashtirib qo‘yishni va’da qilgan shaxs qo‘lga olindi. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti ma’lum qildi.
Qayd etilishicha, Bosh prokuratura, Departamentning Shaxsiy xavfsizlik boshqarmasi hamda Departamentning Qashqadaryo viloyati boshqarmasi xodimlari hamkorligida o‘tkazilgan tezkor tadbirda zaxiradagi kichik serjant U.K. fuqaro A.O.ga o‘zini go‘yoki Qashqadaryo viloyati prokuraturasi xodimi sifatida tanishtirgan.
U fuqaroning ukasi L.O.ni Mudofaa vazirligi tizimiga ishga kiritib qo‘yishni va’da qilib, buning evaziga 3 ming AQSH dollari talab qilgan. Gumonlanuvchi kelishilgan pul mablag‘ining 1,5 ming AQSH dollarini olayotgan vaqtida ashyoviy dalillar bilan ushlangan.
Mazkur holat yuzasidan Jinoyat kodeksining 168-moddasi (firibgarlik) hamda 28, 211-moddalari bilan jinoyat ishi qo‘zg‘atilib, tergov harakatlari olib borilmoqda.
