Qozog‘istonda O‘zbekiston bilan chegaradagi bojxona postlarida tirbandliklar yuzaga kelishi mumkin
13-iyun soat 21:00 dan 14-iyun soat 08:00 gacha Qozog‘iston axborot tizimlarida uzilishlar kuzatiladi.
Qozog‘iston Respublikasi Moliya vazirligi huzuridagi Davlat daromadlari qo‘mitasi ma’lumotiga ko‘ra, 2026-yil 13-iyun soat 21:00 dan 14-iyun soat 08:00 ga qadar rejali texnik ishlar amalga oshiriladi.
Mazkur davrda ayrim axborot tizimlari faoliyatida vaqti-vaqti bilan uzilishlar kuzatilishi mumkin.
Bojxona qo‘mitasi raisining matbuot kotibi Husan Tangriyevning ma’lum qilishicha, ushbu holat O‘zbekiston va Qozog‘iston chegarasida joylashgan bojxona postlarida transport vositalari harakatining sekinlashishiga hamda tirbandliklar yuzaga kelishiga sabab bo‘lishi mumkin.
Shu munosabat bilan eksport, import va tranzit yuk tashuvlarini amalga oshirayotgan tashqi iqtisodiy faoliyat ishtirokchilaridan yuk tashish jarayonlarini mazkur holatni inobatga olgan holda oldindan rejalashtirish so‘ralmoqda.
